Sat 24 Jan 2009
دده کاتبین " گونوموزآیدین " کیتابی
اوندان سونرا بوتون دونیا مسلامانلارینین آراسیندا ظاهر و باطن دوغرو بیر وحدت و بیرلیک یارادان آللاهدان دیله ییریک کی بوتون دونیا مسلامانلاری پیغمبرین شریف عصرینده اولدوغو کیمی مسلمانلارین بوتونو بیر-بیریله دوغرو قارداش اولسونلار.
اما دگرلی و حؤرمتلی اوخوجولاریمیز،بیز بو (گونوموز آیدین)آدلی کتابیمیزی چاپا چاتدیرماق ایسته ییریک.آللاهدان فرصت و نصرت و یاردیم دیله ییریک ، تکراراً بوتون اوخوجولارا و هامی ییزا هر زاماندا و هر مکاندا و هر مقامدا و هر پئشه ده یار اولسون.
حؤرمتلی اوخوجولار، بیز بوندان اول چاپا چاتدیردیغیمیز "اینجی لی صدف" آدلی کتابیمیزدا شعر سؤیله مکدن و شاعر لیکدن بیر حدودا قدر سؤز آچمیشیق.بورادا دا بیر قسمت سؤزلری دئمگی و سؤیله مگی لازم گؤروروک کی شعر نه دیر؟ و شاعیر کیم دیر؟ و شاعیرین شعر سؤیله مکدن هدف و آماجی نه دیر؟ و یا خود شعر و شاعیرلیک رابطه سینده آللاهین و عظمتلی اسلام پیغمبرین نظر مبارکی نه دیر؟ و یا خود اسلام دینینین قورلوشوندان بو گونه قدر اسلام عالیملرینین،شعر و شاعیرلیک رابطه سینده باخیملاری نه اولوب و ایندی نه دیر؟
حؤرمتلی اوخوجولار، بیر آز دقت لازیمدیر.قرآن کریمین "شعرا" سوره سینین سون آیتلرینده یارادان آللاه شاعرلردن و شعر سؤیله مکدن ایلک ده بیر نحو ایله انتقاد ائدیر و اونلاری چیرکینله دیر(پیسله ییر).اما عین آیتین آردیجا استثنا گتیره رک عرفانی دوغرو شاعرلری مدح ائدیر.بورادان آنلاشیلیر کی او شاعیرلری کی قورآنیمیز اونلاری پیسله ییر ایچسیز و محتواسیز و خرافی سؤزلری شعر قالبینه سالمیش اونلاری بو گون عقل عالمی ده رد ائدیر.اما اونون قارشیسیندا دوغرو و محتوالی شعر سؤیله ین شاعرلری مدح ائدیر و گئنه ده قرآن کریمده "یاسین" سوره سینین دوخسان بیرینجی آیتینده یارادان آللاه مشرکلرین گئدیسلرینه خطاب بئله بویورورکی: بیز اونا یعنی پیغمبر اسلام حضرتلرینه شعر و شاعرلیک اؤیرتمه میشیک و شعر و شاعرلیک او حضرتین شأنینده دگیل مگر آللاه ذکری و آچیق آیدین بیر قورآن نازل ائتمیشیق.
حؤرمتلی اوخوجولار، بورادا بیر مطلبه آرتیق دقت ائتمه میز لازیمدیر. آللاه تعالانین بویوردوغو بو معنایا دگیل کی شعر سؤیله مکدن انتقاد اولسون بلکه شعر شاعیرلیگین مقامی پایه سی آللاه کلامینا همان قورآن اولسون تای اولا بیلمز و اوندان آشاغیدیر.اما حضرت پیغمبرین شریف حدیثلرین بیرینده بئله بویورموش کی بیر مؤمنین قلبی یا جوفی چرک و کیر ایله دولو اولسون اما شعر ایله دولو اولماسین.درگرلی اوخوجولار، بو حدیثین آنلامیندا و معناسیندا اشاره دیر خرافی شاعرلرین شعیرلرینه.
اما باشقا بیر حدیث نبوی ده او حضرت بویورموش حقیقتاً و دوغوردان شعر و شعر سؤیله مکده گؤزل بیر حکمتلر وار. و ها بئله حضرت پیغمبر اسلامین حال و حیاتیندا اصحاب کرامدان بیر نئچه دانه شاعرلری واردی کی زامان زامان او حضرتین حضور شریفینده شعر اوخویاردیلار کی صحابه کرامدان بیریسی "حسان ابن ثابت " کی پیغمبر ایسلامین ان اوستون آدلی شاعریدی کی پیغمبریمیز حسانین شعرلرینین رابطه سینده حدیث شریف ضمنینده بئله بویورموش کی حسانین شعرلری کفار و مشرکلر اوزه رینه و علیهینه کسگین قیلینجلاردان داها کسگیندیر.
دیرلی و حورمتلی اوخوجولار، بورادا آرتیق دقت ائتمک لازیمدیر.یوخاریدا یازدیغیمیز آیه و حدیث شریفلرینین ظاهرلری بیر-بیریله متضاد اولور اما معنی و مفهوم و محتوالرینه درین دقت اولونرسا هئچ بیر تضاد آرادا سوخدور بلکه بوتونون مفهوم و معناسی و محتواسی آنجاق بیردیر.
دگرلی و حؤمتلی اوخوجولار بلکی واقعی و دوغرو شاعیر لر هر زاماندا اساس و دوغرو مطلب لری انسانلیق و اسلامیت شأنینه یارشیقلی بیر صورتده ادا ائتمیشلر.
...
اوغلویام
یارادانا شوکر ائیلرم
من بیر مسلمان اوغلویام
فکر ائتمه میش دانیشمارام
بیر دوغرو انسان اوغلویام
الهام آلمیشام قورآندان
عبرت آلمیشام زاماندان
قورخمام توزدان دوماندان
دالقالی توفان اوغلویام
من بیر تورکم بوزقوردلویام
اوغوز،دده قورقوردلویام
بیر قیزقین آتش اودلویام
بیر غیرتلی قان اوغلویام
دده کاتب ائلیم تورکدور
دوغرو دوزگون یولوم تورکدور
خوش دانیشان دیلیم تورکدور
من آذربایجان اوغلویام
*****
آغلادی
قادر آللاه بو محنتدن بو غمدن
یاندیم جسم ایچینده جانیم آغلادی
پروانه تک آلیشمیشام آتشه
قایناییب جسدده قانیم آغلادی
سگگیز سجده گاهیم بیر یانا دؤندو
بئش جسمیم اعضادا دیوانه دؤندو
قلبیم قانا گؤزوم عماا دؤندو
ایکی عینیم بیر زبانیم آغلادی
اود آلیب آلیشدیم اوره کده ناریم
گئجه گوندوز بیر آللاهه بالواریم
بوتون اوچ یوز آلتمیش داماریم
دؤرد یوز قیرخ دؤرد استخوانیم آغلادی
کاتب بیر آللاهه واردی پناهیم
بایقو تک ویراندا کیم بیلیر آهیم
دنیزلر جمع اولسا چوخدو گوناهیم
یاد ائدینجه روح روانیم آغلادی
*****
دونیا
اعتیبارسیز چرخ دوران
کیمسه بیلمز ایشین دونیا
نئچه ارلری یوروبسان
چوخدو سنین یاشین دونیا
نه سولطانه نه خانه سن
قالمادین سلیمانه سن
یوردلار قویدون ویرانه سن
پوزالایدی داشین دونیا
اون ایکی آی ایلین واردی
بیر آلدادان دیلین واردی
نئچه فندی فعلین واردی
فن اولوبدی ایشین دونیا
دده کاتیب بودور بحثیم
یورقونام یوخدو هوسیم
قوش اوچار قالار قفسیم
چوخ آجیدی آشین دونیا
*****
اویانسین
قادر آللاه گئتسین قیشین دومانی
یئنی باهار گلسین گوللر اویانسین
چیچک لنسین یوردوموزون هر یانی
یاغمور یاغسین جوشقون سئل لر اویانسین
گوللر بیزیم اولسون قازلار بیزیمکی
سؤزلر بیزیم اولسون سازلار بیزیمکی
ماراللار بیزیمکی نازلار بیزیمکی
یایلا یاشیللانسین ائل لر اویانسین
قدرت لنسین اییت لرین قوللاری
گوجلنک قپسایاق ساغی سوللاری
ووراق پوزاق آچاق باغلی یوللاری
جاده لر شن اولسون یوللار اویانسین
بیر-بیره دایانسین گوجلو چیگین لر
قاراباغ دان چیخسین قودوز خائن لر
باکیدا اوخوسون آشیق قادینلر
بارماق مضراب چالسین تئل لر اویانسین
دده کاتب قیساتمارام دیلیمی
حقه دوغرو باغلامیشام بئلیمی
چوخ سئورم آذربایجان ائلینی
آذربایجان تورکی دیل لر اویانسین
*****
نه عادت دیر؟
قادر آللاه نه عادت دیر زاماندا؟
یوخسو لون دوز سؤزون هئچ کس حاقلامیر
نه قوهوم نه قارداش نه ده قونشولار
ایل لر دؤنور بیر-بیرینی یوخلامیر
مؤمن قارداش هردن تویا گلنده
مین لیک سپیر تویچولاری گؤرنده
اون بئش تومن مستحققه وئرنده
سانجی توتور صبحه کیمی یوخلامیر
علم مجلسیندن دولانیر اوزاق
معنالی سؤزلرده اولوبدور قاچاق
معناسیز سؤزلره قوچ اوغلو قوچاق
انگی برکدی ها دانیشیر لاخلامیر
دده کاتب اگری یولدان قئییدر
فلک دییرماندی خاقی اویودر
بیر آتا بیر سورو اولاد بؤیودر
سگگیز اوغول بیر آتانی ساخلامیر
